SOLO, solopopuler.com – Siji pelaku penjambretan kasil diamankan dening Tim Sparta bebarengan karo Tim Resmob Polresta Solo ing Kantor Kelurahan Mangkubumen, Banjarsari, Kota Solo. Pelaku sing diamankan duwe inisial DW (49), pawongan soko Cimahi, Bandung, diduga melu aksi njambret tas siji wanito ing njero mobil.
Kedadean iki diwiwiti nalika Rebo (12/02/2025) sekitar jam 17.00 WIB, nalika korban, Ratna (51), warga Banjarsari, Solo, lagi nyetir mobil saka simpang Kelurahan Mangkubumen menyang Masjid Sholihin. Nalika iku, mobil korban diuber karo papat pelaku sing nganggo telung unit sepeda motor. Nalika mobil korban tekan ngarep Apotik Padma, pelaku ngepet mobil lan njupuk tas korban sing ana ing kursi samping. Kaca mobil korban sing ora ditutup nggampangake pelaku njupuk tas karo isine.
Sawijining warga sing ndeleng kedadean iki banjur mbantu ngejar para pelaku. Ing ngarep Batik Semar, siji pelaku kasil diamankan sawise tiba nalika dipepet dening warga, dene telung pelaku liyane kasil kabur. Pelaku sing kasil diamankan banjur dibawa menyang Kantor Kelurahan Mangkubumen lan diamankan dening petugas Linmas setempat.
KAWOCO : Modus Janji Rabi, Pelaku Asal Lampung Gasak Motor Korban, Wis Ping Telu Tumindak Curanmor
Petugas Linmas banjur nelpon call center Tim Sparta. Sawise nampa informasi kasebut, Tim Sparta bebarengan karo Tim Resmob Polresta Surakarta langsung menyang lokasi. Nalika tekan Kantor Kelurahan Mangkubumen, dheweke nemokake pelaku lan korban sing wis diamankan dening petugas Linmas.
Kasat Samapta Polresta Surakarta, Kompol Arfian Riski Dwi Wibowo, SIK, nerangake manawa sawise pelaku diamankan, petugas nindakake penggeledahan lan kasil nyita barang bukti kayata siji tas sing isine dompet, handphone, lan siji unit sepeda motor Honda Vario sing digunakake pelaku. ” Pelaku lan barang bukti banjur dibawa menyang Mako Sat Reskrim Polresta Surakarta kanggo proses penyidikan luwih lanjut, ” pitutur kasat.
Kapolresta Solo, Kombes Polisi Catur Cahyono Wibowo, liwat Kasat Samapta, ngapresiasi kerjasama antarane warga lan petugas sing kasil ngamanke pelaku. “Iki minangka asil kerjasama sing apik antarane masyarakat lan aparat keamanan. Kita bakal terus berupaya njaga keamanan lan ketertiban ing Kota Solo,” ujare Kompol Arfian.
Kedadean iki dadi peringatan kanggo masyarakat supaya tansah waspada lan mesthekake kendaraan ing kahanan aman, utamane nalika nyetir ing dalan umum. (Agung Santoso)
